示威現場出手保護同路人被重判 面對放學後跌宕起伏未言棄 中年手足根叔自述放學後經歷

2019抗爭運動凝聚能量之大，不僅僅在於告別以往「和理非」範式，black bloc着裝、參與直接行動示威之間，有不同年齡手足。今期細葉榕手足故事，將由根叔（為保護身份化名）第一人稱出發，講述參與社運、被囚到重投社會歷程，以及最初申請細葉榕人道援助基金因由。

「我叫根叔，同好多香港人一樣，2019年嗰陣上街示威聲援反送中運動。不過，因為日頭要搵食，好多時喺夜晚收工之後先參加聚集。直到十月，政府宣布要立《禁蒙面法》當晚，我喺現場見到有人一邊揸住磚頭一邊拆路障，眼見同場有啲其他手足，驚佢哋危險就出手制止嗰啲拆路障嘅人，結果不幸被捉到。」

「同好多社運案一樣，律政司落案嗰陣用咗刑期較重的「傷人17」起訴。當日喺現場，一身街坊裝俾人影到哂，冇得揀惟有認罪啦。我喺庭上試過解釋㗎，當晚出手旨在保護年輕手足，擔心嗰啲唔知咩人，攞住磚頭會傷到人先郁手阻止。最後法官都冇接納減刑，冇計最終判咗幾年監，到2022年底先至出嚟，叫做重獲自由。」

「根叔我早出身，好後生就做嘢幫補家計，讀書唔多兼一把年紀，出冊要過搵份安定工作發覺都幾難。疫情期間周圍環境一般，啱啱放學出來又得自己一個人，重新開始生活初頭過得有啲艱苦。幸好，一出牆外就有不少手足幫手，一邊同我申請資助，又四出奔波租屋，最緊要係搵到份清潔工，讓根叔叫做可以回一回氣，慢慢重新立足社會。」

失去過自由的人會知道，一旦外面有事情未了，諸多煩惱在牆內會變得更加棘手。根叔除了要為案件賠償一筆錢外，先前房子租約未完、信用卡數、電話雜費等要花心機處理。回想起當時，根叔自言不時發愁。即使膝下有兒，但仔女有各自世界，難聽點講仔細老婆嫩，根叔作為父親又怎能再要求他們不斷付出，最後只好欠下朋友又一筆人情債。

「我本來打算出嚟後努力工作，正職以外再跑多份兼職夜更，盡快還返朋友幫手墊支嘅錢啦。估唔到香港依家經濟都真係好麻麻，開始返清潔工冇幾耐，公司就話要執笠。原先諗住清潔工萬零蚊人工夠俾燈油火蠟，咁兼職份收入儲起嚟就可以逐個月還返先前同朋友借嘅錢，但霎那間連自己生活開支俾唔俾到都成問題。」

如果沒有感到過傍徨及憂愁，這當然是自欺欺人。幸好，根叔在牆內時得知細葉榕人道基金，剛放學有手足協助申請，等候一輪後終於獲批。對比起其他更生援助只夠資助獲釋後短期車馬費，細葉榕每個月幾千元援助為根叔帶來一陣及時雨，馬上減輕不少經濟壓力。

很多上了年紀的手足反映，放學後求職遇到的困難不比未成年手足低。背負着案底，意味保安工作也不用考慮。根叔説到，年紀大、學歷不高、手腳慢，「換轉我係老闆都唔會考慮請自己啦」。

根叔這段路途猶幸得到手足關照，其後再獲介紹工作。洗衣店新工作要跑上跑落擔擔抬抬，對踏入耳順之年的根叔，實在相當吃力，無法再找夜更兼職工作。不過，現在這個時勢，但求工作穩定，有收入支撐起生活，毋須再打人情牌，根叔便相當知足。

「呢幾年好多人確實過得唔容易，根叔慶幸一班舊雨新知伸出援手，而放學後能夠遇返同聲同氣嘅手足相聚，再難捱都有大家互相打吓氣，講真都相當感恩。希望大家記得而家仍然喺牆內，或者被迫去到海外嘅手足們，等佢哋唔好孤苦伶仃。大家加油！」

插畫：@sidelee.studio

文：Vicent Vega